काठमाडौं । प्रमुख प्रतिपक्ष दल मा‌ओवादी केन्द्रका अध्यक्ष पुष्पकमल दाहाल ‘प्रचण्ड’ ले नागरिकको अभिव्यक्ति स्वतन्त्रतालाई कुण्ठित गर्ने उद्देश्यले सामाजिक सञ्जाल विधेयक ल्याइएको आरोप लगाएका छन् । बिहीबार प्रतिनिधिसभा बैठकमा बोल्दै अध्यक्ष प्रचण्डले सामाजिक सञ्जाल नियमन गर्न बनेको विधेयकले वैधानिक रूपमा प्रेस स्वतन्त्रतालाई नियन्त्रण गर्न खोजेको तर्क गरे ।

इन्द्रजात्रामा काठमाडौं महानगरपालिकाका मेयर बालेन्द्र शाह (बालेन)को तस्बिर इङ्कित टिसर्ट लगाएका नागरिकलाई नियन्त्रणमा लिएको र आशिका तामाङलाई हिरासतमा राखिएको प्रसङ्गलाई सङ्केत गर्दै उनले भने, “टिसर्टमा कसैको फोटो देखेको भरमा पनि तपाईँहरूले नागरिकलाई नियन्त्रणमा लिनुभयो । सार्वजनिक सेवा प्रवाहमा प्रश्न गर्नेलाई पनि थुन्नुभयो, मुद्दा चलाउनुभयो । अब त सामाजिक सञ्जाल नियमन विधेयक ल्याएर नै अभिव्यक्ति स्वतन्त्रता र प्रेस स्वतन्त्रलाई वैधानिक रूपमा नै नियन्त्रण गर्न खोज्दै हुनुहुन्छ ।”

नागरिक सम्प्रभुता र संविधानभन्दा माथि कोही नरहेको स्पष्ट पार्दै उनले भने, “तपाईँहरू मालिक, नेपाली जनता दास हुन् र ?”

सामाजिक सञ्जाल विधेयकतर्फ इङ्गित गर्दै उनले नागरिकलाई पाइलैपिच्छे जेल र जरिवानाको तरबार झुन्ड्याइएको प्रतिक्रिया दिए । “अहिले त बोलेकै भरमा हातमा हत्कडी झुन्ड्याएर हरेक जिल्ला घुमाइरहेको सरकारले विधेयक पारित भएपछि के होला ?” उनले प्रश्न गरे ।

आफ्नो प्रधानमन्त्री रहँदा सामाजिक सञ्जाललाई स्वनियमन गर्नुपर्नेमा जोड दिएको दाबी गर्दै प्रचण्डले विगतमा सामाजिक सञ्जाल विधेयकको विपक्षमा उभिएको नेपाली कांग्रेसको आधिकारिक धारणा के हो भनी पनि प्रश्न उठाए ।