सुर्खेत — नेपाल पत्रकार महासंघ कर्णाली प्रदेशले कर्णाली प्रदेशका मुख्यमन्त्री यामलाल कँडेललाई ६ बुँद्धे अवधारणा पत्र बुझाएको छ ।

आमसञ्चारका सम्बन्धमा व्यवस्था गर्न बनेको विधेयकमा भएको छलफलमा सहभागी भएसँगै महासंघका पदाधिकारीले मुख्यमन्त्रीलाई अवधारण पत्र बुझाएका हुन् ।

महासंघले प्रदेशमा रहेका पेसागत संघ संगठन र सरोकारवाला निकायहरूसँगको छलफलपछि साझा अवधारणा तयार गरेर मुख्यमन्त्री कँडेललाई बुझाएको हो ।

पत्रकार महासंघ, कर्णाली प्रदेशले स्थापनाकालदेखि संघमा केन्द्रित आमसञ्चार क्षेत्रका अधिकारहरू प्रदेशमा हस्तान्तरण गर्न तथा प्रदेश सरकारले आमसञ्चारसम्बन्धी एकीकृत कानुन निर्माण गरी स्वायत्त संरचना बनाउन माग गर्दै आए पनि अहिले बन्दै गरेको विधेयकमा स्वायत्त संस्था बनाउने अवधारणा नभएको र अन्य विषयहरू पनि छुटेपछि सर्वपक्षीय सहमतिका आधारमा अवधारणा पत्र बुझाइएको पत्रकार महासंघ कर्णाली प्रदेशका महासचिव खगेन्द्र भट्टराईले जानकारी दिएका छन् ।

अवधारणा पत्रका कार्यकारी बोर्ड गठन प्रक्रियाको दायरा फराकिलो र समावेशी बनाउनुपर्ने, आमसञ्चारमाध्यमहरुको संस्थागत विकास, उपकरण अनुदान, पत्रकारको क्षमता विकाससम्बन्धी प्रावधानहरू समेट्नुपर्ने, यसका लागि क्षेत्रगत प्रतिनिधित्व हुने गरी उपसमितिहरू गठनको व्यवस्था हुनुपर्ने, स्वायत्त संरचनाको दिगो व्यवस्थापनका लागि अन्तर मन्त्रालयका प्रतिनिधिसहितको निर्देशक समितिको व्यवस्था हुनुपर्ने, विधेयकले सूचना प्रविधि, डिजिटल सञ्चारमाध्यम र न्यु मिडियालाई समेत सम्बोधन गर्नुपर्ने लगायतका विषय समावेश गर्न आग्रह गरेको छ ।

महासंघका पदाधिकारीहरूको सहभागितामा नेपाल पत्रकार महासंघ कर्णाली प्रदेशका अध्यक्ष विष्णु शर्माले अवधारणा पत्र मुख्यमन्त्री कँडेललाई बुझाए ।

अवधारणा पत्र बुझ्दै मुख्यमन्त्री कँडेलले आफू प्रदेशमा निर्माण हुने विभिन्न संरचनाहरू र त्यसको सुरुवाती गर्न तयार रहेको बताए । प्रदेशको आर्थिक अवस्था कमजोर भएकोले स्वायत्त संस्था बनाउने विषयमा केही चुनौती हुने देखिएकोले अहिले सुरुवात गर्ने विषय महत्त्वपूर्ण रहेको उनको भनाइ थियो । प्राप्त सुझावहरूलाई समेटेर प्रभावकारी कामको थालनी गर्ने उनले बताए ।