सल्यान — जिल्लाको कपुरकोट गाउँपालिका–४ किमुचौरस्थित नेपाल राष्ट्रिय माविले डिजिटल प्रविधिको माध्यमबाट पठनपाठन सुरु गरेको छ । विद्यार्थी तथा शिक्षकलाई पठनपाठनमा सहजताका लागि विद्यालयले डिजिटल प्रविधिका माध्यमबाट पठनपाठन सुरु गरेको हो ।

विद्यार्थीलाई डिजिटल प्रविधिको माध्यमबाट पठनपाठन गराउन विद्यालयले ट्याप र प्रोजेक्टर प्रयोग गर्दै आएको छ । उक्त प्रविधिबाट पठनपाठन गराउँदा विद्यालयका शिशुदेखि १२ कक्षासम्मका ६ सय १८ विद्यार्थी र दुई दर्जन शिक्षक लाभान्वित भएका छन् ।

प्रविधिको विकाससँगै पठनपाठन शैलीमा परिवर्तन ल्याउन र पढाएको कुरा सहजै रूपमा बुझाउन विद्यालयमा डिजिटल प्रविधिको माध्यमबाट पठनपाठन सुरु गरेको विद्यालयका प्रधानाध्यापक दामोदर शर्माले बताए ।

उनका अनुसार डिजिटल प्रविधिमार्फत पठनपाठनका लागि पालिकाले ४ लाख, गत वर्ष संघीय अनुदान ६ लाख ५० हजार, राष्ट्रपतीय शैक्षिक सुधार कार्यक्रमको ६ लाख ५० हजार र अघिल्लो वर्षको संघीय अनुदान आईसीटीअन्तर्गत ६ लाख ५० गरी २३ लाख ५० हजार रुपैयाँमा विद्यालयका १९ कक्षाकोठा डिजिटल प्रविधिमार्फत पठनपाठनका लागि तयार गरिएको थियो ।

विद्यालयकी आधारभूत तहकी शिक्षिका यमकुमारी सुवेदीले पहिलाको र अहिलेको तुलनामा पठनपाठनमा धेरै फरक रहेको बताइन् । कम्प्युटर तथा टिभीमा जस्तै चित्र हेरेर पढ्न पाउँदा साना बालबालिका पढ्न झनै उत्साहित भएको उनले जानकारी दिइन् ।