दैलेख — दैलेखको भैरवी गाउँपालिका -१ जलजले क्षेत्रमा रहेको पेट्रोलियम पदार्थको अन्वेषणअन्तर्गत ड्रिलिङको काम ६० प्रतिशत काम सकिएको छ । चार महिना भित्र ड्रिलिङको काम सक्ने गरी गत जेठदेखि काम सुरु गरिएको थियो ।

चिनियाँ र नेपाली टोलीले ३ महिनादेखि २ चरणमा काम गर्दै आएका छन् । वर्षौदेखि ज्वाला बलिरहेका यी स्थानमा पेट्रोलियम पदार्थ भएको अनुसन्धानबाट देखिएपछि अन्वेषण थालिएको हो ।

चार हजार मिटर गहिराइसम्म ड्रिलिङ गर्नु पर्नेमा हाल सम्म २३ सय ५७ मिटर ड्रिलिङ भइसकेको खानी तथा भुगर्भ विभागका भूगर्भविद डा. दिनेस त्रिपाठीले बताए । ‘अबको दुईमहिना भित्र काम सक्ने योजनाअनुसार काम गरिररहेका छौं,’ उनले भने, ‘जमिनमुनि कडा चटान भएकाले मेसिनहरुमा समस्या देखा परेको छ ।’

विज्ञहरुले २/२ मिटर गहिराइबाट निस्किएका ढुंगा र माटो परीक्षण गरी तथ्यांक संकलन गरिरेहकाे उनले बताए । २७ सय मिटर ड्रिलिङ भएपछि सोर्स रक, रिजर्भ वायर रक र सिल रक गरी ३ वटा थप अध्ययन हुने छ । पेट्रोलियम पदार्थ हुनका लागि तय गरेका आवश्यक मापदण्ड अन्तर्गतका संकेतहरु सफलतापूर्वक प्राप्त भइरहेको छ । ड्रिलिङका लागि दैलेखको भैरवी गाउँपालिका–१ जलजलेमा ४५ रोपनी जग्गा अधिग्रहण गरिएको छ ।

हाल चिनियाँ र नेपाली गरी ८० जनाको समूहले ड्रिलिङको काम गरिरहेको छ । दैलेखको शिरस्थान नाभिस्थान पादुका स्थानमा तीन वर्षभित्र पेट्रोलियम पदार्थको अनुसन्धान सक्ने गरी चिनियाँ सरकारसँग सन् २०१९, फेब्रअरी २८ मा सम्झौता भएको थियो ।

ड्रिलिङ गरेपछि कति पेट्रोलियम पदार्थ छ भन्ने पत्ता लगाउन सकिन्छ भूगर्भविद त्रिपाटीले खानी भेटिएपछि त्यसको आर्थिक विश्लेषण सहित काम अघि सार्ने बताए । चीन सरकारको २ अर्ब ५० करोड रूपैयाँ अनुदानमा पेट्रोलियम पदार्थको अन्वेषण भइरहेको हो । ४ हजार मिटर गहिराइसम्म ड्रिलिङ भएपछिमात्र पेट्रोलियम पदार्थ पत्ता लाग्ने छ ।

पेट्रोलियम पदार्थ अन्वेषण तथा उत्खनन अन्तर्गत पहिलो चरणको काम चिनियाँ प्राविधिक टोलीले पहिलो चरणअन्तर्गतको सिस्मिक सर्भे, जियोलोजिकल सर्भे, म्याग्नेटो टेल्युरिक सर्भे र जिओ केमिकल स्याम्पलिङ सर्भे गरी चार वटा सर्भेका काम तोकिएकै समयमा सम्पन्न गरिसकेको थियो ।